Java e fundit në Bundesligë ishte një përzierje emocionesh të forta, rekordeve të reja dhe paraqitjeve individuale të shkëlqyera – ku tre ngjarje spikatën veçanërisht: fitorja bindëse e Bayern Munich, forma e mrekullueshme e Fisnik Asllanit dhe një shkatërrim total nga Leipzig ndaj Augsburgut.
Bayern i pandalshëm, Gladbach në rrëzim të lirë
Bayern Munich vazhdoi marshimin e tyre perfekt këtë sezon, duke regjistruar fitoren e 13-të radhazi në të gjitha garat me një 3-0 të pastër në transfertë ndaj Borussia Mönchengladbach. Adoleshenti Lennart Karl shkroi histori duke u bërë golashënuesi i tretë më i ri i Bayernit në histori të Bundesligës, ndërsa Joshua Kimmich dhe Raphaël Guerreiro vulosën rezultatin pas një pjesë të parë ku vendasit rezistuan me shumë mund.
Gladbach, që mbeti me një lojtar më pak që në minutën e 18-të, nuk kishte armë për të ndalur furinë e bavarezëve. Për më tepër, humbën një 11-metërsh në momentin vendimtar dhe tani ndodhen katër pikë larg zonës së shpëtimit, duke qenë e vetmja skuadër ende pa fitore në kampionat.
Asllani ndëshkon sërish – Hoffenheim rikthehet fuqishëm
Në “PreZero Arena”, TSG Hoffenheim siguroi fitoren e parë në shtëpi këtë sezon, duke mposhtur Heidenheim 3-1 falë një paraqitjeje solide dhe të disiplinuar. Fisnik Asllani, golashënuesi më i mirë i skuadrës deri më tani, zhbllokoi takimin me një finalizim fantastik nga distanca, duke shënuar golin e tij të pestë në kampionat. Ai gjithashtu asistoi në aksionin që çoi në golin e dytë nga Lemperle, ndërsa veterani Andrej Kramariç vulosi fitoren me një tjetër perlë në pjesën e dytë.
Me këtë rezultat, Hoffenheim ngjitet në vendin e shtatë dhe vazhdon të konfirmojë potencialin për të luftuar për zonën europiane, ndërsa Heidenheim mbetet pa fitore jashtë fushe dhe me një bilanc gjithnjë e më problematik.
Leipzig në version “horror” për Augsburgun – 6 gola dhe dominim total
Në një nga paraqitjet më dominuese të sezonit, RB Leipzig shkatërroi Augsburgun me rezultatin tenistik 6-0, duke barazuar fitoren e dytë më të thellë në historinë e klubit në Bundesliga. Yan Diomande, Rômulo, Antonio Nusa, Baumgartner, Assan Ouédraogo dhe Castello Lukeba ishin protagonistët e një mbremjeje ku çdo aksion dukej si gol për “Die Roten Bullen”.
Leipzig shfaqi një mjeshtëri të rrallë në organizimin ofensiv dhe efikasitetin përpara portës, ndërsa Augsburg regjistroi një tjetër performancë të dobët në mbrojtje, duke u bërë skuadra me mbrojtjen më të dobët në elitën gjermane këtë sezon. Forma e Leipzigut është në rritje të pandalshme – kjo ishte ndeshja e shtatë radhazi pa humbje – dhe ata tashmë duken si ndjekësi më serioz i Bayern Munich në luftën për titull.
