Legjenda e klubit Jerome Boateng përballet me protestë publike nga tifozët pas mundësisë për të ndjekur stërvitjet në Mynih.
Tifozët e Bayern Munich kanë reaguar ashpër ndaj mundësisë që Jérôme Boateng të rikthehet në ambientet e klubit, edhe pse jo në rol zyrtar. Gjatë fitores 2-1 ndaj Borussia Dortmund, në tribunat e „Allianz Arena“ u shfaqën pankarta me mesazhe të qarta si: “Nuk ka skenë për dhunuesit” dhe “Kush i jep hapësirë dhunuesve, ndan fajin me ta”.
Reagimi vjen pas vendimit të Gjykatës së Mynihut në korrik 2024, që e shpalli Boateng fajtor për dhunë fizike ndaj ish-partneres. Ai e ka mohuar vazhdimisht akuzën, ndërsa ligjërisht nuk konsiderohet si person i dënuar më parë.
Kompany i hap dyert, tifozët i mbyllin
Trajneri i Bayernit, Vincent Kompany, i kishte ofruar Boateng-ut mundësinë për të ndjekur disa seanca stërvitore në kuadër të përgatitjes për licencat e trajnerit. Ish-mbrojtësi ka përfunduar licencën B dhe synon të vazhdojë me licencën A dhe PRO.
“Do të jem i pranishëm për të mësuar dhe e pres me entuziazëm këtë mundësi. Na mbetet vetëm të gjejmë momentin e duhur”, deklaroi Boateng për Bild.
Klubi distancohet: “Nuk është punësim”
Zëdhënësi i klubit dhe drejtori sportiv Max Eberl theksuan se nuk bëhet fjalë për ndonjë angazhim zyrtar.
“Ai vetëm do të ndjekë stërvitjet për disa ditë. Nuk ka asnjë marrëveshje punësimi”, tha Eberl, duke shtuar se nuk dëshiron të komentojë mbi protestën e tifozëve.
Një emër i madh me të kaluar të debatueshme
Boateng është një nga figurat më të suksesshme në historinë e Bayern-it. Ai luajti për klubin nga viti 2011 deri në 2021, duke fituar nëntë tituj kampionë në Bundesliga dhe dy Liga të Kampionëve. U shpall futbollisti më i mirë gjerman në vitin 2016 dhe ishte pjesë e ekipit që fitoi Kupën e Botës me Gjermaninë në vitin 2014.
Por, pavarësisht arritjeve, pjesë e tifozërisë nuk është e gatshme ta shohë sërish të lidhur me klubin. Protesta e tyre është një sinjal i qartë se reputacioni personal nuk është më vetëm çështje statistike, por edhe morali.
