Novak Gjokoviç u tërhoq nga ndeshja për vendin e tretë në turneun “Six Kings Slam” në Riad, pasi ndjeu dhimbje në këmbën e majtë dhe vendosi të mos rrezikojë një dëmtim më serioz. Amerikanit Taylor Fritz iu dha fitorja pasi fitoi setin e parë pas 76 minutash lojë të fortë, me rezultatin 7:6 (4), ndërsa Djokoviç vendosi të mos vazhdojë ndeshjen.
Meqë u përshëndet nga publiku me duartrokitje, Gjokoviç u shpreh i prekur dhe u drejtua me një mesazh të ndjerë:
“Më vjen shumë keq. Shpresoj të më kuptoni – ndjeva një dhimbje në këmbën e majtë dhe nuk doja të ecnim drejt një dëmtimi më të rëndë. Nuk jam në gjendjen time më të mirë dhe më vjen keq që nuk patët mundësinë të shihnit një set të dytë. Ishte një set shumë i gjatë dhe sfidues, një nga më të vështirët që kam luajtur kohët e fundit. Taylor luajti në mënyrë të shkëlqyer – e përgëzoj. Faleminderit për mbështetjen dhe mikpritjen në Riad. Shpresoj të rikthehem vitin tjetër.”
Humbje e rëndë edhe në gjysmëfinale
Gjokoviç kishte pësuar edhe një humbje të thellë në gjysmëfinale ndaj Jannik Sinner, me rezultatin 6:2, 6:4. Pas asaj ndeshjeje, ai pati theksuar se nuk ishte në formën më të mirë për shkak të kalendarit të ngjeshur dhe problemeve fizike që e kanë shoqëruar që nga US Open.
Pas përfundimit të ndeshjes, Taylor Fritz shprehu respekt të thellë për rivalin e tij:
“Novak është një legjendë. Të luash me gjithë këtë presion dhe pritshmëri nuk është aspak e lehtë, veçanërisht para një publiku si ky. I uroj rikuperim të shpejtë dhe shpresoj të përballemi sërish së shpejti.”
