Xhiroja e dytë e Raiffeisen Superligës A për femra konfirmoi dominimin e Fer Volley dhe vazhdimësinë e Skënderajt, ndërsa Drita ka dhënë sinjale të qarta për rikthim në garën për pozita më të larta.
Fitorjet e pastra 3:0 tregojnë qartë dallimin në nivelin e përgatitjes mes ekipeve në këtë fazë të sezonit, ndërkohë që pritet me interes të shihet vazhdimësia e këtyre skuadrave në javët e ardhshme.
Fer Volley 3:0 Ferizaj
Setet: 25:20, 25:11, 25:20
Në derbin lokal të zhvilluar në Ferizaj, Fer Volley ka konfirmuar formën e lartë duke shënuar një tjetër fitore bindëse, kësaj here ndaj skuadrës së Ferizajt, me rezultat të pastër 3:0.
Vajzat e Fer Volley dominuan ndeshjen në të gjitha aspektet – me organizim solid, disiplinë taktike dhe efikasitet të lartë si në sulm ashtu edhe në mbrojtje.
Kjo fitore i forcon pozitat e ekipit në renditje dhe dëshmon qartë formën e mirë në të cilën ndodhet skuadra në këtë fillim sezoni.
Gjinoci 0:3 Skënderaj
Setet: 14:25, 14:25, 21:25
Skuadra e Skënderajt ka regjistruar fitoren e dytë radhazi në këtë edicion të Superligës, duke mposhtur ekipin e Gjinocit në udhëtim me rezultat të pastër 3:0.
Me lojë të disiplinuar dhe dominim të plotë në të dyja fazat e lojës, vajzat e Skënderajt e kontrolluan takimin nga fillimi deri në fund, pa lejuar asnjë moment për kthesë nga kundërshtari.
Fitorja konsolidon pozitën e ekipit në mesin e skuadrave pretendente për kreun e tabelës.
Prishtina 75 0:3 Drita
Setet: 21:25, 21:25, 16:25
Drita e Gjilanit ka arkëtuar fitoren e parë të sezonit në Superligën A, duke triumfuar në udhëtim ndaj Prishtina 75 me rezultat 3:0.
Skuadra gjilanase zhvilloi një ndeshje të matur dhe shumë të disiplinuar, duke treguar përvojë dhe karakter sidomos në pikat vendimtare të seteve.
Ky rezultat i rikthen Dritës besimin dhe është një shtysë e rëndësishme për ndeshjet e radhës në kampionat.
