Como nuk arriti të konkretizojë dominimin në fushë, duke barazuar 0-0 ndaj Parmës në stadiumin “Ennio Tardini”, në një sfidë pa shumë emocione dhe pa gola.
Për Crociatit ishte barazimi i dytë radhazi 0-0, dhe një tjetër sinjal shqetësues për formën e tyre – vetëm një fitore në tetë ndeshjet e fundit të kampionatit. Nga ana tjetër, Como, që vinte nga një fitore e madhe 2-0 ndaj Juventusit, nuk ia doli të çante murin mbrojtës të Parmës, pavarësisht se dominoi posedimin e topit (70%).
Në minutën e 12-të, Patrick Cutrone ishte pranë golit të parë, kur goditja me kokë ndaj ish-skuadrës së tij përfundoi në traversë. Ai u përfshi edhe në një gol të anuluar për offside pak para pushimit. Trajneri Cesc Fabregas reagoi me dy zëvendësime në fillim të pjesës së dytë, por skuadra e tij mbeti sterile në sulm – vetëm një gjuajtje në portë nga Lucas Da Cunha.
Në fund, asnjëra skuadër nuk arriti të krijonte realisht rrezik në portat respektive, me të dy portierët që patën një pasdite të qetë. Parma regjistroi barazimin e tretë në pesë ndeshjet e fundit, ndërsa Como zgjat serinë e saj pozitive në shtatë ndeshje pa humbje (3 fitore, 4 barazime), duke ruajtur vendin e gjashtë në renditje.
Berisha shkëlqen me gol nga goditja e dënimit, por Lecce mposhtet nga Udinese
Medon Berisha shënoi një gol të bukur për Lecce-n, por skuadra e tij nuk ia doli të shmangte humbjen 3-2 ndaj Udinese-s në “Bluenergy Stadium”.
Udinese siguroi fitoren e parë në shtëpi në Serie A që nga muaji mars, duke i dhënë fund një serie prej tetë ndeshjesh pa fitore para tifozëve të vet. Protagonist absolut ishte Arthur Atta, që asistoi në dy golat e parë: fillimisht për Jesper Karlström dhe më pas për Keinan Davis.
Lecce u zgjua në pjesën e dytë, pas zëvendësimeve të Eusebio Di Francescos, dhe ngushtoi rezultatin me një supergol nga goditja e dënimit i Medon Berishës nga 25 metra – një finalizim mjeshtëror që i dha shpresë vizitorëve.
Medon Berisha shkëlqen me një gol spektakolar nga goditja e dënimit për Lecce!
Ndërkohë, Ylber Ramadani luajti gjithë ndeshjen për Lecce-n, ndërsa Berisha u zëvendësua pas gati një ore lojë.
Pavarësisht presionit në fund të takimit, Lecce nuk arriti të përmbyste rezultatin. Udinese shënoi golin e tretë me Adam Buksa pas një kundërsulmi, ndërsa Konan Ndri realizoi në minutën e 96-të për të ngushtuar rezultatin në 3-2 – rezultati përfundimtar i një sfide me ritëm të lartë në pjesën e dytë.
Lecce regjistroi vetëm humbjen e dytë në shtatë transfertat e fundit në kampionat, por me këtë rezultat rrezikon të zvarritet më thellë drejt zonës së rënies.
