Sunderland befasoi Chelsean në shtëpinë e saj me një fitore dramatike 2-1, duke u ngjitur në vendin e dytë të Premier League dhe duke i dhënë fund serisë prej katër fitoresh të Bluve në të gjitha garat.
Chelsea e nisi vrullshëm ndeshjen dhe kaloi në epërsi që në minutën e 4-të, kur Pedro Neto shpërtheu në kundërsulm dhe asistoi për Alejandro Garnacho, i cili realizoi golin e tij të parë për londinezët me një goditje të ulët mes këmbëve të portierit Roefs.
Por Sunderland nuk u dorëzua. Pas një rrëmuje në zonën e Chelseat nga një goditje anësore, Wilson Isidor përfitoi dhe e shtyu topin në rrjetë nga afërsia, duke barazuar rezultatin dhe rikthyer ekuilibrin në ndeshje. Isidor ishte pranë një goli të dytë, por goditja e tij përfundoi jashtë. Chelsea reagoi sërish në fundin e pjesës së parë me një shans të mirë të Garnachos dhe një goditje nga distanca të Chalobah, që u devijua në mënyrë vendimtare nga Roefs.
Në pjesën e dytë, trajneri Enzo Maresca kërkoi freski në lojë dhe aktivizoi brazilianin Estêvão, i cili menjëherë pas hyrjes rrezikoi me një goditje të devijuar që kaloi pranë shtyllës. Megjithatë, Sunderland, që për herë të parë këtë sezon luajti me pesë mbrojtës, u mbrojt në mënyrë të organizuar dhe e kufizoi Chelsean në gjysmëraste.
Në fund, skuadra e Régis Le Bris mori shpërblimin maksimal: në kohën shtesë, Brian Brobbey mbajti topin në zonë dhe asistoi për Chemsdine Talbi, i cili goditi saktë për golin e fitores – një goditje e befasishme për vendasit.
Fitorja e jashtëzakonshme e mban Sunderlandin të pamposhtur në 14 ndeshje radhazi jashtë fushe ndaj skuadrave londineze (5 fitore, 9 barazime), ndërsa Chelsea zbret në vendin e shtatë, tre pikë larg nga vendi i dytë që tani mbahet nga skuadra e surprizës së sezonit.
