AC Milan përmbysi gjithçka në “San Siro” me një fitore 2-1 ndaj Fiorentinës, duke marrë kreun e tabelës në Serie A dhe duke zhytur më thellë ekipin vjollcë në zonën e rënies.
Në një mbrëmje kur fitorja e Interit ndaj Romës i kishte hapur Milanit rrugën drejt vendit të parë, kuqezinjtë rrezikuan të mos e shfrytëzonin këtë mundësi. Pas vetëm katër minutash, Fikayo Tomori pati një rast të artë, por mbrojtësi goditi mbi traversë nga një pozicion ideal.
Pak para gjysmës së pjesës së parë, serbi Strahinja Pavloviç shpërdoroi një tjetër rast të pastër, duke mbyllur një 45-minutësh të parë tejet zhgënjyes për vendasit. Gjithçka ndryshoi në minutën e 55-të, kur Robin Gosens kaloi Fiorentinën në epërsi me golin e tij të parë këtë sezon në Serie A.
Leao zgjon “San Siro”-n
Ky gol shërbeu si zgjim për Milanin, që reagoi shpejt. Në minutën e 63-të, Rafael Leao lëshoi një goditje të fuqishme nga 25 metra që përfundoi në cepin e portës, duke shpërthyer entuziazmin e tifozëve në “San Siro”. Kuqezinjtë rrezikuan sërish në minutën e 76-të me një tentativë të Santiago Giménez, por De Gea bëri një pritje të mrekullueshme për të mbajtur rezultatin në barazim.
Kur gjithçka dukej se do të mbyllej në barazim, VAR ndërhyri pesë minuta para fundit duke akorduar penallti për Milanin. Leao mori përsipër ekzekutimin dhe me qetësi dërgoi De Gea-n në krahun e kundërt për të përmbysur rezultatin në 2-1.
Fiorentina nuk kishte më fuqi për të reaguar, dhe kështu Milani siguroi një fitore vendimtare që e ngjit në krye të tabelës me një pikë më shumë se ndjekësit. Një mbrëmje speciale për trajnerin Stefano Pioli, që festoi ndeshjen e tij të 500-të në Serie A si trajner.
