Shkollimi i trajnerëve të hendbollit vazhdon – një investim në të ardhmen sportive
Zhvillimi i kuadrove të reja në sport mbetet gjithmonë një hap i mirëpritur dhe i domosdoshëm për rritjen cilësore të garave dhe përgatitjen e brezave të ardhshëm.
Federata e Hendbollit e Kosovës, në bashkëpunim me Shoqatën e Trajnerëve të Hendbollit të Kosovës, do të vazhdojë nesër (e martë) ciklin e shkollimit të trajnerëve sipas standardeve të RINCK Konventës, që është pjesë e sistemit zyrtar të trajnimit të Federatës Evropiane të Hendbollit (EHF).
Kësaj radhe, bëhet fjalë për modulin e dytë të nivelit të dytë, i cili përfshin 78 njësi mësimore që mbulojnë aspektet teknike të hendbollit dhe temat përkatëse nga shkencat sportive.
Ligjërues në këtë modul do të jenë emra të njohur të hendbollit evropian dhe vendor, si:
Nenad Shoshtariq, Jure Shterbucl, Murat Bilge, Ivan Çupiq, Agron Shabani, Verim Zherka dhe Tringa Dedi.
Ky program është pjesë e përpjekjeve të vazhdueshme për ngritjen profesionale të trajnerëve në vend, duke siguruar që niveli i përgatitjes të jetë në përputhje me kërkesat dhe trendet bashkëkohore të hendbollit evropian.
