Ish-nënkryetari i Barcelonës, Jordi Mestre, ka bërë një deklaratë të fortë.
Ish-nënkryetari i FC Barcelonës, Jordi Mestre, ka bërë një deklaratë befasuese, duke thënë se Lionel Messi dhe familja e tij janë ende të tërbuar me presidentin aktual të klubit, Joan Laporta, për largimin e papritur të yllit argjentinas në vitin 2021, për shkak të problemeve financiare të klubit.
„Çfarëdo që të bëjmë për të, do të jetë gjithmonë e pamjaftueshme. Ajo që ka dhënë ai për ne është mbresëlënëse – jo vetëm në nivel sportiv, por edhe financiar: turnet me Lionel Messin ishin një gjë, ndërsa turnet pa të ishin diçka krejt tjetër. Është e vërtetë që kishte një rrogë shumë të mirë, por ai e meritonte, dhe gjithashtu solli shumë të ardhura për klubin“, deklaroi Mestre.
„Ka pasur lojtarë që erdhën te Barça vetëm sepse donin të luanin me Messin – yje të klasit botëror që zgjidhnin Barcelonën sepse ishte Leo aty. E di nga burime të treta që Leo Messi dhe familja e tij janë shumë, shumë të zemëruar me Laportën. Shumë të zemëruar. Ajo që tha për barbekjunë… e kemi parë edhe më parë.“
„Aktualisht nuk e di çfarë kanë në mendje, por mendoj se, çfarëdo që të bëjmë për Messin, nuk do të jetë kurrë mjaftueshëm. Unë do të bëja diçka historike për të. Nuk po them vetëm një statujë, por ndoshta… një tribunë me emrin Leo Messi. Që emri i tij të trashëgohet brez pas brezi.“
Më tej, Mestre foli edhe për largimin e Neymarit, duke zbuluar se Messi dëshironte rikthimin e brazilianit te Barça.
„Më vjen shumë keq që nuk funksionoi me Neymarin, sepse ishte një lojtar i jashtëzakonshëm“, shtoi ai.
„Teorikisht, ai ishte pjesë e planeve tona si pasuesi i Leos. Dhe Leo e donte rikthimin e tij – më tha: ‚E dua Neymarin përsëri.‘ Dhe e kuptoj, sepse Neymar ishte shumë efektiv në duelet një për një. Nëse Leo duhej të bënte gjithçka vetë, ishte një situatë; por nëse e bënin bashkë Leo dhe Neymar, gjërat ndryshonin.“
