Të dielën pasdite, bota e futbollit do t’i drejtojë sytë nga Santiago Bernabeu, shtëpia e Real Madridit, ndërsa ata përballen me Barcelonën në një tjetër ndeshje të madhe “El Clasico”.
Skuadra e Xabi Alonsos e ka nisur sezonin 2025/26 të LaLigës në formë të shkëlqyer dhe aktualisht kryeson tabelën me 24 pikë nga 27 të mundshme, duke fituar tetë dhe humbur vetëm një nga nëntë ndeshjet e para.
Barcelona mund të ngjitet në krye me fitore
Ekipi i Hansi Flick është menjëherë pas tyre, pavarësisht problemeve me lëndime, dhe me 22 pikë nga ndeshjet e deritanishme mund ta kalojë Realin në krye me një fitore në kryeqytet.
Pas fitoreve kundër rivalëve të përjetshëm në çdo përballje të sezonit të kaluar, përfshirë edhe finalen e Kupës së Mbretit, katalanasit janë në formë, por me kaq shumë mungesa, do të jetë e vështirë ta vazhdojnë serinë pozitive.
Të premten, Raphinha mungoi në seancën e fundit stërvitore të Barçës, edhe pse e kishte kaluar javën pa probleme.
Nëse nuk do të rrezikohet, ai do t’i bashkohet listës së të dëmtuarve, ku janë edhe sulmuesi kryesor Robert Lewandowski, mesfushorët Dani Olmo dhe Gavi, si dhe portieri titullar Joan Garcia.
Frenkie de Jong është rikthyer në stërvitje pas një sëmundjeje, kështu që mund të jetë i gatshëm për ndeshje.
Edhe pse katalanasit kanë treguar se dinë të përballen me mungesat, El Clasico është gjithmonë një sfidë krejtësisht ndryshe.
Kylian Mbappe ka arritur shifrat dyshifrore
Me Kylian Mbappen që po shkëlqen – 10 gola deri tani, të paktën katër më shumë se çdo lojtar tjetër në kampionat – kampioni i botës me Francën është kërcënimi më i madh për një tjetër fitore të Barçës. Linja e lartë mbrojtëse që funksionoi sezonin e kaluar është goditur shpesh këtë sezon.
Kjo u pa më së miri në humbjen 4-1 ndaj Sevillas në “Ramon Sanchez Pizjuan”, ndërsa ndaj Real Sociedad shpëtuan me fat në disfatën 2-1.
Real Madrid ka pësuar vetëm një humbje – 5-2 kundër rivalëve të qytetit, Atletico Madrid – dhe kujtimi i asaj ndeshjeje do të jetë motivim shtesë, ashtu si edhe rikthimi në formë pas dëmtimit i Jude Bellingham, që shpesh ka qenë “makuar” për Barcelonën.
Gola të garantuar në El Clasico
Në përballjet e fundit janë shënuar gjithmonë shumë gola – në gjashtë ndeshjet e fundit janë shënuar të paktën katër gola për ndeshje.
Fitorja e fundit e Realit në LaLiga kundër Barcelonës ishte më 21 prill 2024. Që atëherë, Barça ka shënuar 4, 5, 3 dhe 4 gola në përballjet pasuese.
Sulmi i Barcelonës me Rashfordin dhe Yamalin
Megjithëse mund të mungojnë dy nga tre sulmuesit kryesorë, Marcus Rashford është në formë të mirë, dhe një tjetër gol apo asist në ndeshjen më të madhe të klubeve në botë do të forconte pozitën e tij për të qëndruar në klub pas huazimit.
Lamine Yamal është rikthyer plotësisht në formë dhe mezi pret një tjetër përballje të madhe, që do të testojë fort mbrojtjen e Realit.
Mbrojtja e Realit e dëmtuar rëndë
Realit do t’i mungojnë Dean Huijsen, Dani Carvajal, Antonio Rüdiger dhe David Alaba, tre prej të cilëve janë zakonisht titullarë.
Fede Valverde është detyruar të luajë si mbrojtës i djathtë, Alvaro Carreras në të majtë, ndërsa Alaba dhe Militao formuan qendrën kundër Getafes para se austriaku të dëmtohej.
Kjo e bën të domosdoshme që Bellingham, Tchouameni dhe Camavinga të mbështesin ekipin në të dyja drejtimet.
Si do të përballen me hapësirat midis linjave dhe me Fermin Lopez, që lëviz në ato zona, mund të jetë faktori vendimtar.
Një tjetër vendim i madh për Alonson është nëse do ta rikthejë Vinicius Junior në formacionin titullar.
Lënia jashtë e tij në ndeshjen më të rëndësishme të sezonit do të ishte një sinjal i fortë për brazilianin, i cili ka 5 gola dhe 4 asistime, njësoj si Lamine. Ta linte jashtë tani do të ishte një goditje e madhe për të.
Pedri mund të përcaktojë rezultatin
Tifozët e Barcelonës mund të gjejnë ngushëllim te statistikat: ekipi i tyre kryeson LaLigën për gola (24), goditje (190), goditje në portë (77), pasime (5817) dhe saktësi pasimi (90%).
Pedri ka bërë 820 pasime dhe krijuar 22 raste për gol – më shumë se çdo lojtar tjetër i Barçës – duke treguar edhe një herë rëndësinë e tij. Nëse ndikimi i tij krijues do të neutralizohet, Real Madrid mund të marrë kontrollin e lojës.
Të dy skuadrat kanë saktësi identike pasimesh dhe statistika pothuajse të barabarta.
Asnjëra nuk ka humbur pas shënimit të golit të parë, por të dyja kanë humbur kur kanë pësuar të parat.
Real është më i rrezikshëm në 15 minutat para pushimit (6 gola), periudhë kur Barça është më e dobët (4 të pësuar), ndërsa katalanasit shënojnë më shumë në 15 minutat e para të pjesës së dytë (6 gola) dhe në 15 minutat e fundit (6 gola), periudhë në të cilën Real shpesh pëson.
