Cristiano Ronaldo po i afrohet një arritjeje që asnjë futbollist tjetër në histori nuk e ka arritur: 1000 gola në karrierë. Superylli portugez shënoi sërish për Al Nassr, në fitoren 2-0 ndaj Al-Hazm në kampionatin saudit, duke e çuar totalin e tij të golave në 950 për klub dhe kombëtare.
Në moshën 40-vjeçare, Ronaldo vazhdon të sfidojë kohën dhe rekordet. Goli i tij erdhi në minutën e 88-të të takimit, pasi João Félix kishte kaluar më herët Al Nassr-in në avantazh. Me këtë realizim, ai jo vetëm që e mbylli ndeshjen, por edhe i shtoi një tjetër gur themeli ndërtimit të legjendës së tij.
Ronaldo mbetet golashënuesi më i mirë i Al Nassr këtë sezon dhe nuk jep asnjë shenjë ngadalësimi. Me vetëm 50 gola larg kuotës 1000, ai është në rrugën për të vendosur një rekord absolut në historinë e futbollit botëror – një arritje që mund të mos përsëritet kurrë më.
