Suedisë i duhet një nisje e re në fushatën kualifikuese për Kupën e Botës, ndërsa të hënën në mbrëmje do të presë Kosovën në Gothenburg. Pas tre ndeshjeve, suedezët janë në fund të Grupit B me vetëm një pikë, ndërsa „Dardanët“ vazhdojnë garën për një kualifikim historik.
Gjendja e ekipeve
Suedisë po i zbehen shpresat për një biletë drejt Kupës së Botës „Amerika e Veriut 2026“, pas një fillimi zhgënjyes në grupin kualifikues.
Fushata nisi me një barazim 2-2 në udhëtim ndaj Sllovenisë, por më pas u pasua nga dy humbje, përfshirë edhe disfatën e fundit kundër Zvicrës dhe humbjen befasuese ndaj Kosovës muajin e kaluar.
Presioni mbi trajnerin Jon Dahl Tomasson është në nivelin më të lartë. Gjatë humbjes me Zvicrën, tifozët shpalosën pankarta kundër trajnerit, përfshirë një që kërkonte dorëheqjen dhe një tjetër me mesazh fyes: „Danish b*****d“.
Sipas një sondazhi të realizuar nga gazeta suedeze Sportbladet, 90% e 40 mijë lexuesve kërkuan shkarkimin e Tomassonit.
Nga katër edicionet e fundit të Kupës së Botës, Suedia ka marrë pjesë vetëm në një, dhe pavarësisht garancive të trajnerit se gjithçka mbetet e mundur, entuziazmi mes tifozëve është i ulët.
Ndeshja e së hënës do të jetë një mundësi për hakmarrje ndaj Kosovës, pas humbjes 2-0 në Prishtinë – një nga disfatat më të turpshme për Suedinë në vitet e fundit.
Kosova në ngritje
Pas fitores ndaj Suedisë, Kosova dëshmoi se ajo nuk ishte një rastësi, duke barazuar pa gola me Slloveninë.
Me Zvicrën që ka fituar të tre ndeshjet pa pësuar gol, kualifikimi direkt është shumë i vështirë. Megjithatë, ekipi i Franco Fodas është në garë të ngushtë me Slloveninë dhe Suedinë për vendin e dytë – që mund të sjellë një biletë për fazën play-off.
Në vitin 2017, Kosova renditej në vendin e 177-të në ranglistën e FIFA-s. Të qenët sot në garë për kualifikim përfaqëson një arritje madhore.
Forma e skuadrës është mbresëlënëse: vetëm një humbje në tetë ndeshjet e fundit, me gjashtë fitore dhe dy barazime. Dy ndeshjet e fundit janë mbyllur me porta të paprekura dhe Kosova udhëton drejt Suedisë me vetëbesim të lartë.
Forma e skuadrave
Suedia në kualifikime (Evropë): Barazim – Humbje – Humbje
Forma e përgjithshme e Suedisë: Fitore – Fitore – Fitore – Barazim – Humbje – Humbje
Kosova në kualifikime (Evropë): Humbje – Fitore – Barazim
Forma e përgjithshme e Kosovës: Fitore – Fitore – Fitore – Humbje – Fitore – Barazim
Lajmet nga ekipet
Suedisë i mungon portieri veteran Robin Olsen, i cili ka ndërprerë marrëdhëniet me trajnerin Tomasson. Në një intervistë për Aftonbladet, Olsen deklaroi se nuk do të luajë më për kombëtaren për aq kohë sa trajneri aktual është në detyrë.
Viktor Johansson nga Stoke City ka zëvendësuar Olsenin dhe pritet të jetë titullar ndaj Kosovës.
Sulmi i Suedisë është i frikshëm në letër, me yje si Alexander Isak (Liverpool) dhe Viktor Gyokeres (Arsenal), por të dy nuk kanë bindur në ndeshjet e fundit.
Roony Bardghji la mbresa pozitive kundër Zvicrës dhe mund të nisë si titullar të hënën.
Kosova, prej ndeshjes me Slloveninë do të jetë pa mesfushorin Rexhbeçaj të lënduar dhe Alitit me kartonë për shkak të problemeve shëndetësore.
Vedat Muriqi, sulmuesi i Mallorcës, mbetet arma kryesore e „Dardanëve“, me 32 gola në 62 ndeshje – rekord për kombëtaren. Ndërkohë, Mergim Vojvoda është lojtari me më shumë paraqitje, duke regjistruar të 68-tën të premten.
Formacionet e mundshme
Suedia:
Johansson; Gudmundsson, Hien, Lagerbielke; Bardghji, Ayari, Karlstrom, Bergvall, Bernhardsson; Isak, Gyokeres
Kosova:
Muric; Gallapeni, Sadriu, Hajdari, Krasniqi; Berisha, Avdullahu, Vojvoda; Rrahmani, Muriqi, Muslija
