Një prej volejbollistëve më të suksesshëm që ka prodhuar ndonjëherë Kosova, Gazmend Husaj, aktualisht pjesë e klubit KV Peja, për Kërlaçki ka komentuar zhvillimet më të fundit në volejbollin botëror, si dhe sfidat dhe ambiciet në skenën vendore.
Përshtypjet nga Kampionati Botëror: Një spektakël i nivelit të lartë
“Kampionati Botëror ishte një turne i jashtëzakonshëm, i mbushur me emocione dhe surpriza. Çdo kombëtare dha maksimumin, duke treguar nivel dhe përkushtim të admirueshëm”, deklaroi Husaj.
Ai vlerësoi lart Italinë, e cila triumfoi në këtë edicion pas një paraqitjeje të shkëlqyer që nga faza e grupeve. “Fitorja 3:0 ndaj Polonisë, që shihej si favoritja kryesore, ishte një nga momentet kulmore të kampionatit”, theksoi ai.
Një tjetër skuadër që la mbresa sipas tij ishte Bullgaria. “Me një ekip të ri dhe moshë mesatare 22 vjeç, Bullgaria tregoi potencial të madh për të ardhmen”, shtoi Husaj.
Renditja përfundimtare, sipas tij, ishte e merituar: Polonia në vendin e tretë dhe Çekia, një tjetër surprizë, në vend të katërt.
KV Peja dhe ambiciet për dominim vendor dhe rajonal
Duke folur për sezonin aktual me KV Peja, Husaj vuri në dukje traditën e gjatë që ka qyteti në këtë sport.
“Peja është një nga bastionet e volejbollit në Kosovë. Sivjet jemi pjesë e Superligës së Kosovës dhe Ligës Unike, ku përballemi me ekipet më të mira nga Kosova dhe Shqipëria. Synimi ynë është i qartë: të fitojmë çdo trofe dhe të tregojmë profesionalizëm maksimal.”
Sipas Husajt, volejbolli në Kosovë ka filluar të lëvizë në drejtimin e duhur, por mbetet ende punë për t’u bërë. “Niveli nuk është ende aty ku duhet për t’u përfaqësuar denjësisht ndërkombëtarisht, por ka përparim. Disa klube kanë filluar të funksionojnë në mënyrë më profesionale, dhe volejbolli po kthehet në një profesion për shumë lojtarë e trajnerë”, u shpreh ai.
Vëmendje e shtuar dhe përfshirje në rritje
Husaj veçoi rritjen e interesimit, veçanërisht tek gjinia femërore. “Ka shumë vajza që zgjedhin volejbollin, sepse shihet si një sport i pastër dhe intelektual. Financimi i klubeve, mbështetja e sponsorëve dhe përfshirja e mediave po japin ndikimin e tyre në rritjen e nivelit”, tha ai.
Një karrierë ndërkombëtare me suksese të shumta
Me mbi 15 vite karrierë në nivelet më të larta të volejbollit botëror, Husaj ka përjetuar momente të paharrueshme. Ai veçon periudhën në Serie A në Itali, ku u shpall fitues i Kupës dhe arriti gjysmëfinalen e Ligës së Kampionëve. “Në Francë, përjetova një tjetër kapitull të jashtëzakonshëm, duke u shpallur kampion, fitues i Kupës dhe Superkupës, si dhe duke përfunduar sezonin pa asnjë humbje – një rekord europian me 32 fitore.”
Aktualisht i kthyer në Kosovë, ai synon të kontribuojë në zhvillimin e volejbollit vendor. “Ende nuk kam vendosur si do të vazhdoj më tej, por gjithçka do të jetë e lidhur me sportin”, tha ai.
CV-ja e një kampioni me përvojë globale
Në karrierën e tij të pasur, Husaj ka qenë pjesë e shumë klubeve elitare në Europë dhe Lindjen e Mesme:
-
KV Peja (2023/24 – 2024/25)
-
Kuwait Club (2022/23)
-
Shabab Al-Ahli (2021/22)
-
Bursa BBSK (2020/21)
-
Olympiacos (2019/20)
-
Tours VB (2018/19)
-
İnegöl Belediyespor (2015–2018)
-
Maliye Milli Piyango Ankara (2014/15)
-
Copra Elior Piacenza (2013/14)
-
Qatar S.C. (2012/13)
-
Al-Muharraq (2011/12)
-
Studenti Tirana (2010/11 dhe 2006–2008)
-
Chênois Genève VB (2009/10)
-
Shkëndija Tetovë (2008/09)
“Jam i përmbushur me karrierën time. Kam luajtur në 10 vende të ndryshme dhe kam fituar shumë trofe. Edhe pse aspekti financiar nuk ishte prioriteti kryesor, një karrierë e tillë sigurisht që vlerësohet edhe në këtë drejtim”, përfundon Husaj.
