Sonte në Selanik, kampionët e Kosovës, KB Trepça, zhvillojnë ndeshjen e parë në Grupin F të garave evropiane përballë skuadrës greke, PAOK. Takimi pritet të fillojë në orën 19:15 dhe do të luhet në një atmosferë të ndjeshme, për shkak të tensioneve të mundshme jashtë sportit.
Drejtori i klubit mitrovicas, Izet Tahiri, ka konfirmuar se deri tani gjithçka është duke shkuar sipas planit.
“Deri më tani nuk kemi asnjë vërejtje. Urojmë që gjithçka të vazhdojë të jetë në rregull edhe në palestër gjatë ndeshjes,” tha Tahiri.
Nën mbikëqyrjen e policisë greke
Skuadra e Trepçës po mbahet nën vëzhgim të rreptë nga policia greke, për shkak të frikës se ndonjë anëtar nga grupet serbe mund të përfshihet në incidentet e mundshme — edhe pse këto mbeten vetëm spekulime, pa ndonjë konfirmim zyrtar.
Tifozët, ideologjitë dhe masa të rrepta sigurie
Tifozët e PAOK-ut janë të njohur për ideologjinë e tyre anarkiste dhe për lidhjet vëllazërore me grupet e tifozerisë së Beshiktashit në Turqi, si dhe me “Grobari”-t, tifozët e Partizanit të Beogradit. Për këtë arsye, autoritetet greke kanë ndaluar praninë e tifozëve të Trepçës në këtë ndeshje.
Numri i anëtarëve të delegacionit të Trepçës është i kufizuar në minimum, dhe masat e sigurisë janë maksimale.
Mbetet të shihet nëse përballja do të zhvillohet në një atmosferë sportive, apo në një ambient të tensionuar – kjo do të vërtetohet sonte në Selanik.
