Një hap i vogël, por i rëndësishëm për futbollin lokal.
Presheva, ndonëse nuk ka pasur ndonjë traditë të theksuar në futbollin e luajtur, ka hedhur një hap të rëndësishëm drejt krijimit të kushteve bazë për zhvillimin e kësaj loje popullore. Kryetarja e Komunës së Preshevës, Ardita Sinani, ka ndarë në rrjetet sociale fotografi nga fusha e saporenovuar, e cila tashmë ofron hapësirë të pranueshme për stërvitje dhe ndeshje.
Klubi lokal, KF Lugina, ka funksionuar deri tani në mungesë të infrastrukturës minimale sportive. Por pamjet e fundit tregojnë një përmirësim domethënës – fusha është ndërtuar ose riparuar, duke i dhënë ekipit mundësinë që më në fund të zhvillojë aktivitetin në kushte më të mira.
KF Lugina garon në Ligën e Pestë të Serbisë, konkretisht në Qarkun e Pçinjit, ku bëjnë pjesë edhe dy ekipe të tjera shqiptare: KF Tërnoci dhe KF Besa nga Bujanoci.
Kjo ndërhyrje, megjithëse modeste në përmasa, është e rëndësishme për komunitetin sportiv shqiptar në Luginën e Preshevës, ku investimet në sport kanë qenë të pakta dhe shpesh të lëna pas dore.
