Sigal Prishtina ka vazhduar formën e mirë në edicionin e ri të ProCredit Superligës, duke e fituar bindshëm derbin e kryeqytetit ndaj Borës me rezultat 94:81 (36:14, 17:19, 25:18, 16:30), në ndeshjen e zhvilluar të hënën mbrëma në Pallatin e Rinisë dhe Sportit në Prishtinë.
Bardhekaltrit e nisën furishëm takimin, duke fituar çerekun e parë me rezultat të thellë 36:14, epërsi që u tregua vendimtare për ecurinë e ndeshjes. Pavarësisht përpjekjeve të Borës për t’u rikthyer, Sidomos në periodën e fundit ku shënuan 30 pikë, fitorja e Sigal Prishtinës nuk u vu asnjëherë në dyshim.
Ylli i ndeshjes ishte Arian Azemi, që në 30 minuta lojë realizoi 19 pikë, 5 kërcime dhe 9 asistime, duke e përmbyllur takimin me indeksin më të lartë prej 26. Ai u ndihmua edhe nga Dren Haxhosaj me 7 pikë dhe Dren Polloshka me 9 pikë dhe 8 asistime.
Në anën tjetër, më efikasi për Borën ishte Rrezart Memedi me 22 pikë, ndërsa Gary Singleton dhe Tavian Jackson kontribuan me nga 17 pikë secili.
Kjo ishte fitorja e dytë radhazi për Sigal Prishtinën në sezonin 2025/26, ndërkohë që për Borën ishte humbja e dytë në po aq ndeshje.
| N | F | H | Sh | Pr | KD | P | ||
|---|---|---|---|---|---|---|---|---|
| 1 | Bashkimi | 2 | 2 | 0 | 188 | 143 | +45 | 4 |
| 2 | Sigal Prishtina | 2 | 2 | 0 | 172 | 157 | +15 | 4 |
| 3 | GO+Peja | 2 | 2 | 0 | 162 | 151 | +11 | 4 |
| 4 | Trepça | 2 | 1 | 1 | 185 | 171 | +14 | 3 |
| 5 | Rahoveci 029 | 2 | 1 | 1 | 169 | 166 | +3 | 3 |
| 6 | Golden Eagle Ylli | 2 | 0 | 2 | 147 | 154 | −7 | 2 |
| 7 | Bora | 2 | 0 | 2 | 165 | 189 | −24 | 2 |
| 8 | Vëllaznimi | 2 | 0 | 2 | 154 | 211 | −57 | 2 |
