Atalanta barazoi për të pestën herë radhazi në Serie A, duke ndarë pikët me Milanin në një barazim 1-1 që zgjat serinë e pamposhtur të skuadrës nga Bergamo këtë sezon (2 fitore, 7 barazime). Megjithatë, përformanca e “La Dea” vazhdon të jetë e zbehtë dhe pa forcë për fitore.
Milani erdhi në këtë sfidë i lënduar nga humbja e kreut të tabelës fundjavën e kaluar, por reagoi shpejt: vetëm pas katër minutash, Samuele Ricci kaloi kuqezinjtë në epërsi, pasi një pastrim i dobët nga Honest Ahanor përfundoi në këmbët e tij. Goditja e Ricci-t u devijua nga Éderson dhe përfundoi në rrjetë.
Reagimi i Atalantës ishte pozitiv. Isak Hien dhe Davide Zappacosta patën dy raste të mira për të barazuar, ndërsa Ahanor humbi një mundësi të artë nga afërsia pas një pasimi të bukur nga Mario Pašalić.
Barazimi i merituar erdhi përmes një aksioni të shkëlqyer: Ademola Lookman realizoi një gol të fuqishëm me të majtën pas një asisti të mprehtë nga Pašalić. Ky ishte goli i parë sezonal për përfaqësuesin e Nigerisë dhe e la ndeshjen të hapur për pjesën e dytë.
Pjesa e dytë pa ndryshim rezultati – Allegri më i kënaqur
Milani e nisi më energjik pjesën e dytë, ndihmuar nga futja në lojë e Christopher Nkunku dhe Ruben Loftus-Cheek, i cili zëvendësoi të dëmtuarin Santiago Giménez. Nkunku krijoi menjëherë rrezik, kur krosi i tij u kthye drejt portës nga Davide Bartesaghi, por Fofana gjuajti jashtë nga afërsia.
Nga të dyja anët mungonte qartësia në sulm. Hien humbi me kokë pas një goditjeje këndi nga Marco Brescianini, ndërsa Zappacosta provoi nga distanca por Maignan bëri një pritje vendimtare.
Në fund, barazimi mbeti në fuqi – një rezultat që me gjasë e kënaq më shumë trajnerin Massimiliano Allegri, skuadra e të cilit është tashmë nëntë ndeshje pa humbje në të gjitha garat (6 fitore, 3 barazime). Ndërkohë, Ivan Jurić vazhdon pa fitore ndaj Allegrit pas 10 takimesh (4 barazime, 6 humbje), dhe më shqetësuese akoma, Atalanta ka vetëm 3 fitore në 16 ndeshjet e fundit si vendase në kampionat – një fillim sezoni i çuditshëm për “La Dea”.
