Java e 11-të e Raiffeisen Ligës së Parë është ndarë në dy ditë. Një ndeshje hapëse zhvillohet sot, e premte (10 tetor), ndërsa tetë të tjera do të luhen të shtunën (11 tetor), të gjitha në orën 15:00. Kjo javë pritet të jetë vendimtare për shumë skuadra, me derbi të zjarrtë dhe sfida direkte për pikë shpëtimi.
Java 11 pritet të japë sinjale të qarta se cilat skuadra do të vazhdojnë garën për ngjitje dhe cilat do të mbeten në luftë për mbijetesë. Me tre derbi dhe përplasje direkte për pikë shpëtimi, fundjava në Ligën e Parë do të jetë dramatike.
Analiza e javës 11:
Tefik Çanga – Prizreni
Takimi hapës zhvillohet sot në Ferizaj. Tefik Çanga, skuadër që mban vendin e tretë dhe mbetet ndër më konstantet këtë sezon, pret Prizrenin, i cili ka rigjetur stabilitetin me tre ndeshje radhazi pa humbje. Një duel interesant mes një pretendent dhe një skuadre që po kërkon të dalë nga zona e poshtme.
Vushtrria – Feronikeli 74
Përballja kryesore e javës. Vushtrria e vendit të katërt sfidon liderin Feronikeli në një derbi me shumë histori e rivalitet. Vendasit kanë treguar forcë sidomos në sulm (21 gola të shënuar), ndërsa Feronikeli vjen me një seri mbresëlënëse dhe mbrojtje të hekurt (vetëm 6 gola të pësuar). Fitorja në këtë ndeshje mund të ndikojë direkt në garën për titull.
Liria – Trepça
Një tjetër derbi klasik i futbollit të Kosovës. Liria, e pozicionuar në mesin e tabelës, kërkon të rikthehet në zonën e lartë, ndërsa Trepça, me një formë të paqëndrueshme, ka nevojë për pikë që të mbajë hapin me skuadrat e kreut. Të dyja skuadrat kanë potencial për të bërë diferencën.
Dinamo – Vëllaznimi
Një ndeshje ku të dyja skuadrat vijnë me formë të dobët: Dinamo pa fitore në tre ndeshjet e fundit, ndërsa Vëllaznimi në dy. Të dyja duan të rikthehen në rrugën e rezultateve dhe të ruajnë kontaktin me grupin e kreut. Duel vendimtar për të mos rënë në krizë të thellë.
Kika – Trepça ’89
Kika ka treguar stabilitet në shtëpi dhe ka nevojë për rezultat pozitiv për të forcuar pozicionin në mesin e tabelës. Trepça ’89 është në vendin e pestë dhe me fitore synon të mbetet në zonën pretendente për ngjitje. Ndeshje e hapur dhe me shumë interes.
Suhareka – Besa
Suhareka është në pozitë më të favorshme, ndërsa Besa ka vetëm një fitore në dhjetë ndeshje. Një tjetër disfatë mund ta thellojë edhe më shumë krizën për ekipin nga Peja.
Rilindja 1974 – Ramiz Sadiku
Dy skuadra që vijnë nga rezultate kontradiktore. Rilindja po përpiqet të dalë nga zona e rënies, ndërsa Ramiz Sadiku është ende në garë për kreun dhe nuk guxon të humbë pikë. Duel me objektiva të ndryshëm, por presion të madh për të dyja palët.
Vjosa – Istogu
Një ndeshje direkte për mbijetesë. Vjosa me vetëm një fitore dhe një sulm shumë të dobët, ndërsa Istogu është skuadra që barazon më së shumti. Fitorja për cilëndo nga skuadrat do të kishte vlerë shumë të madhe.
KEK-u – 2 Korriku
Përballja e dy skuadrave në fund të tabelës. KEK-u me dy fitore, 2 Korriku me vetëm një. Një ndeshje që mund të jetë më shumë për krenari se për futboll të bukur, por pikët janë jetike për të dyja.
