Sipas mediave serbe, gjyqtari i njohur i basketbollit Urosh Nikoliç (40), i cili gjykon në ndeshjet e Euroligës, është arrestuar gjatë një operacioni të gjerë policor ndërkombëtar, i udhëhequr nga autoritetet serbe në bashkëpunim me Europol dhe Eurojust.
Nikoliç dyshohet se është i përfshirë në një grup të organizuar kriminal të njohur si „klani i Vraçarit“, që sipas Prokurorisë për Krimin e Organizuar në Serbi, është përgjegjës për një sërë krimesh të rënda, përfshirë vrasje të rënda, tentativa vrasjesh dhe rrezikim të përgjithshëm.
Ai është një nga dhjetë personat e arrestuar në territorin e Serbisë, ndërsa të tjerë janë kapur në Spanjë, Emiratet e Bashkuara Arabe dhe vende të tjera evropiane. Në total, janë arrestuar 29 persona.
Përfshirja e Nikoliç në rrjetin kriminal
Ministri i Brendshëm serb, Ivica Daqiç, ka deklaruar se gjatë kontrollit në banesën e Nikoliç janë gjetur mbi 250 mijë euro para të gatshme, shufra ari dhe orë të shtrenjta. “Ekziston dyshimi i bazuar se Urosh Nikoliç ka shërbyer si mbështetje financiare për veprimtarinë kriminale të klanit të Vraçarit”, tha Daqiç.
Sipas informacioneve jozyrtare, Nikoliç ishte në kontakt të ngushtë me drejtuesit e klanit, përfshirë Nikola Vushoviçin („Xhoni nga Vraçari“), i cili ndodhet aktualisht në një burg në Gjermani, dhe Urosh Piperskin, i burgosur në Portugali. Këta dy të fundit po përballen me akuza të shumta për krim të organizuar dhe disa vrasje.
Krimet e supozuara dhe të arrestuarit e tjerë
Sipas aktakuzës, klani i Vraçarit akuzohet për:
-
Vrasjen e rëndë të Vladimir Popoviçit („Vlada Pop“) në dhjetor 2018
-
Tri tentativa për vrasjen e Nenad Alajbegoviçit („Alibeg“) në vitin 2020
-
Shkaktimin e rrezikut të përgjithshëm në tre raste gjatë viteve 2020 dhe 2021
-
Vrasjen e Vladimir Kostiçit („Kostur“) në vitin 2020, në bashkëpunim me një grup tjetër kriminal
Arrestimet janë bërë në 22 lokacione të ndryshme dhe janë sekuestruar para në monedha të ndryshme, makina luksoze, orë të shtrenjta, telefona të enkriptuar dhe dokumente të falsifikuara të shteteve të BE-së.
Euroliga suspendon gjyqtarin
Pas arrestimit të tij, Federata e Basketbollit të Serbisë (KSS) ka njoftuar pezullimin e menjëhershëm të Nikoliç, ndërsa edhe Euroliga ka reaguar zyrtarisht, duke njoftuar se Urosh Nikoliç është pezulluar nga të gjitha aktivitetet, në pritje të zhvillimeve të mëtejshme hetimore.
Nikoliç është pjesë e ekipit të gjyqtarëve të Euroligës që nga viti 2019 dhe ka gjykuar dy herë në Final Four – në vitin 2021 dhe 2024. Ndeshja e fundit që ai ka gjykuar ishte më 2 tetor të këtij viti, mes Real Madridit dhe Olympiakosit.
Hetimet vazhdojnë, ndërsa komuniteti i basketbollit në rajon po ndjek nga afër këtë rast që mund të ketë pasoja serioze për besueshmërinë e arbitrimit në nivelet më të larta të garave ndërkombëtare.
