Sllovenia do të përballet me Kosovën të premten në stadiumin “Fadil Vokrri” në Prishtinë, në një ndeshje që mund të përcaktojë fatin e saj në kualifikimet për Kupën e Botës 2026. Përfaqësuesja sllovene ndodhet nën presion të madh, pasi ende nuk ka shënuar asnjë fitore në këtë cikël.
Skuadra e drejtuar nga Matjaž Kek ka barazuar 2:2 në shtëpi ndaj Suedisë dhe ka pësuar humbje të rëndë 3:0 në Bazel kundër Zvicrës. Një tjetër dështim, këtë herë ndaj Kosovës, mund t’i shuajë shpresat për një vend në Botëror.
“Pa dyshim që kemi më shumë presion. Ndeshja e së premtes mund të vendosë shumë. Duhet të fitojmë për të mbetur në garë për dy vendet e para. Ndonjëherë presioni ndihmon për të reaguar më mirë dhe shpresoj që reagimi ynë të jetë pozitiv. Besoj se do të kthehemi nga Kosova me tri pikë”, deklaroi Max Elsnik, mesfushori i Cërvena Zvezdës, në një konferencë për media.
Elshnik theksoi se skuadra ka analizuar gabimet e bëra në humbjen ndaj Zvicrës, por tani është e përqendruar plotësisht te sfida me “Dardanët”. “Nuk ka rëndësi se si e arrijmë suksesin, e rëndësishme është të fillojmë të mbledhim pikë. Duhet të luajmë më mirë si ekip dhe të tregojmë karakter. E dimë cilësitë që ka Kosova, por besimi, mentaliteti dhe shpirti luftarak do të jenë vendimtarë”, shtoi ai.
27-vjeçari kujtoi se Sllovenia ka kaluar edhe më parë periudha të vështira, si në kualifikimet për Kampionatin Evropian apo në Ligën e Kombeve, por gjithmonë ka arritur të reagojë në momentet vendimtare. Ai u shpreh se mbështetja e tifozëve në shtëpi do të jetë kyçe për ta.
“Humbja në Bazel ishte e rëndë, por kemi reflektuar. Kemi diskutuar me trajnerin dhe mes vete për të gjetur arsyet. Tani mendojmë vetëm për Kosovën. Tribunat plot na japin forcë – dhe duhet të fitojmë këtë ndeshje jetike para përballjes me Zvicrën javën e ardhshme”, përfundoi Elshnik.
