Borussia Dortmund vazhdoi serinë e pamposhtur në “Signal Iduna Park” në 10 ndeshje radhazi (9 fitore, 1 barazim), por iu desh një gol në sekondat e fundit për të mposhtur një Koln të vendosur me rezultatin 1-0, në një përballje ku portieri Marvin Schwäbe ishte afër të bëhej hero absolut.
Koln, skuadra e sapongjitur që ka grumbulluar 11 pikë në 7 javët e para – shifra më e mirë për një të sapopromovuar në 8 sezonet e fundit – e nisi fort sfidën, duke rrezikuar që në minutat e para me Eric Martel. Nga ana tjetër, Waldemar Anton pati rastin e artë për Dortmundin, por u ndal pikërisht nga një ndërhyrje brilante e Martelit.
Në një pjesë të parë të zjarrtë, Said El Mala e humbi një rast flagrant me portën përballë, duke shkaktuar nervozizëm në pankinën e Lukas Kwasniok. Në anën tjetër, Karim Adeyemi u ndal nga një dalje e shkëlqyer e Schwäbes, që nisi mbrëmjen e tij madhështore.
Në pjesën e dytë, Serhou Guirassy iu afrua golit me një goditje të fortë nga afërsia, por portieri i Kolnit realizoi një tjetër pritje fantastike. Edhe Felix Nmecha dhe Julian Ryerson u ndalën nga „muri i verdhë“ i vërtetë – vetë Schwäbe.
Kur dukej se ndeshja do të përfundonte në barazim, Maximilian Beier u shfaq në minutën e fundit të kohës shtesë dhe me një goditje mjeshtërore mes këmbëve të mbrojtësit dhe portierit, siguroi tre pikët për Dortmundin.
Fitorja e ngjit Dortmundin në vendin e tretë, përpara Stuttgartit, por ende shtatë pikë larg kryesuesve Bayern Munich. Për Kolnin, kjo ishte një mundësi e madhe për të ndërtuar një seri fitoreje jashtë fushe – diçka që nuk e kanë bërë që nga maji 2023 – por ata qëndrojnë në vendin e tetë dhe mbeten në garë për zonën europiane.
